مــن تكــون هـــى ؟؟؟؟

بسم الله الرحمن الرحيم

اسراء عبد الفتاح

مش عارف بصراحة اذا كان اى شخص فينا يعرف الاسم ده قبل كده ولا اول مرة يشوفه

اسراء عبدالفتاح بنت مصرية فى ريعان شبابها

بكرر انها بنت وليست سيدة

اسراء اول شخص نادى باضراب 6 ابريل الماضى على الفيس بوك

تم القبض على اسراء فى غضون احداث الاضراب

وكلف النائب العام بالافراج عنها من سرايا النيابة وتم ترحيلها الى قسم قصر النيل

ومن قسم قصر النيل اختفت اسراء

اسراء سميت اخيرا بفتاة الفيس بوك
او رئيس جمهورية الفيس بوك

بالمناسبة حاجة غريبة جدا فى سرعة الاجراءت فى القبض عليها

لم تستخدم مع عتاولة الفساد فى البلد وبدون ذكر اسماء

بداية من قطار الصعيد ومرورا بالعبارة الغارقة وكمان الحبوب المسرطنة وغيرها وغيرها

يقال ان اسراء عضوة فى حزب الغد ولكن انا مش باتكلم عنها بصفتها الحزبية

انا اساسا لا اميل لحزب الغد وده راى شخصى

لكن هل اسراء اصبحت ضحية اضراب المحلة

بالمناسبة انا عرفت ان مجموعة من بنات الفيس بوك عملت او اعلن عن قيامهن باعتصام امام مجلس الشعب للتضامن مع اسراء ولكن قامت قوات الامن بتفريق شتاتهن فسرن الى المحكمة التى يقام فيها التحقيق مع اسراء وعملن اعتصام هناك

بالمناسبة كمان

وزير الداخلية اعلن لمجموعة اللواءت المسئولة عن الشبكة العنكبوتية بانه فى صدد اصدار قرار اعتقال لخمسين الف من مرتادى شبكة الانترنت

طبعا الاغرب انا اول مرة اعرف ان وزارة الداخلية عندها لواءات مخصوصة لمراقبة الشبكة

طيب يبقى بعد كده ممكن يعملو لكل موقع مديرة امن

بمعنى مثلا يكون مدير امن اصحاب كول وهكذا لكل موقع

بعيدا عن اسراء وقيامها بعمل من وجهة نظرى انها بـ 80 مليون راجل

الاضراب وعمايله

حصاد الاضراب بصراحة كتيرة جدا من مكاسب وخساير وحتى الخوف ظهر بصورة بشعة يومها

الاضراب اظهر لنا حاجة غريبة واصبحت مسلوبة منا بجملة السلب وهيه حق التظاهر

فى كل بلاد الدنيا وفى كل الدساتير حتى الدستور الفرنسى اللى احنا ماشين عليه يعطى المواطن حق الاعتصام والتظاهر ................ واحنا مش قادرين ناخد ابسط حقوقنا لاننا فى الاخر بنتحول من مطالبين بالحقوق الى مشاغبين وبلطجية

الصور اللى شفناها فى الاضراب من اهانة وضرب وحتى التمويت وانا اقصد كلمة التمويت لان لها معانى كتير

اولها تمويت من الخوف ، تمويت فى اكل العيش ، تمويت بالرصاص المطاط
وياااااااه على الرصاص المطاط معلشى افتكرت البنت اللى عينها اتصفت ادامى فى مظاهرة مدينة نصر الخاصة بجامعة الازهر كانت اعتراض على اصدار وزراة الثقافة لكتاب حيدر حيدر الكتاب كان اسمة وليمة فى اعشاب البحر

فعلا فرق كبير بين ما نشوف الصور ويكون واقع ادامنا

انا شفت ردود ناس كتير جدا سؤاء فى الحقيقة لما اتكلمت على الناس اللى ما كانتش بتروح الشغل وجت يوم الاضراب راحت من الساعة 7.5 ادام المصلحة اللى بيشتغلو فيها

وسمعت ردود فى منتدانا هنا عن نفس الموضوع

وكان ابسط الردود انهم خايفين على اكل عيشهم

طيب والناس اللى عملت الاضراب ما كانتش خايفة على اكل عيشهم ولا زى ما قال احد الكتاب فى جريدة الجمهورية ان الناس اللى عملت الاضراب ناس ماجورين ويجب علينا مقاتلهم حتى لا تشيع الفاحشة

والله قالها بنفس اللفظ حتى لا تشيع الفاحشة

اصبح المطالبة بالحقوق فاحشة واصحاب الاقلام هما اللى بيحاربو الفاحشة دى

ههههههههههههههههههههههههه

حاجة تضحك مش صح ولا ايه

اتمنى اننا نفوق ونصحى

والله انا لا معترض على النظام فى مصر ولا من المعارضة ولا اخوان

انا واحد من شعب مصر الغلابة المطوحنين

اللى كل املهم انهم يرجعو بيتهم بفلوس من شغلانة محترمة تكفيه وتكفى بيته

النهاردة كنت فى المنصورة فصادف فى السوبر جيت اتنين من المحلة وبعادتى لما بركب اى مواصلة ما بحبش افتح الكلام مع اى شخص لانى بحب افكر كتير وانا فى اى مواصلة

عموما حصلت مشادة بينه وبين احد الشباب على الكرسى ورقم الكرسى بصراحة انا قمت من مكانى وقعدت الراجل لانه راجل كبير فى السن واتكلمنا عرفت انه من المحلة

بصراحة حسيت بحاجة غريبة وضحكت عليها جدا

الرجل كان بيتكلم والله وبيتلفت حوليه خايف لحد يسمعه ويكون عسكرى مش امين شرطة بدبلوم ولا حتى ضابط

والله الرجل كان بيتكلم بخوف

الرجل بيقول كلام ويرجع يعكسه
يا ترى ليه
اكيد الخوف
مرة تلاقيه يقول ان الناس على حق ويرجع يقول بس غلط

استفدنا ايه قولته يكفى ان ال27 او ال29 الف عمال شركة الغزل خدو حقوقهم قالى الفلوس مش مهم
المهم اننا نعيش مرتاحين
قولتله الفلوس وحالة اقتصاد البلد هيه اللى بتخلى الواحد يرجع بيته مش شايل هموم وراجع لبيته وسط اهله
لكن لو كان الهموم راكباه من ساسه لراسه يبقى العكننة مفتاح خراب البيوت
المهم الرجل وصلنى معلومة غريبة ان فى اكتر من تلات مدارس اتحرقت فى المحلة

الاستغراب مش من حرق المدارس التلاتة انما الاستغراب ازاى المدارس دى اتحرق

هل انا كمواطن هروح من الباب للطاق اولع فى المدرسة ولا اكيد انا شفت الويل والضرب وصلنى لنتيجة انا بحرق اى حاجة ادامى

انا رديت عليه برد واحد قولتله انا شفت صورة لسيدة قوات الامن بتجرجها على الارض افرض ان الست دى اختك هتعمل ايه قالى هولع فيهم قولتله بس هو ده اللى وصلنا له

وصلنا بالاهانة اننا نجرجر الستات على الارض

ما فيش بعد كده اهانة على ما اعتقد

يبقى ما ينفعش نقول نخاف على اكل عيشنا لاننا وصلنا لاهانة اهلنا والستات بالذات

اتمنى اشوف بلدنا احسن بلد

اتمنى اشوف اهلنا احسن ناس

اتمنى اشوف حريتنا كاملة

اتمنى الناس فى الحكم من رئيس الجمهورية لرئيس الوزراء لمجمعو الوزراء لاصغر مسئول عننا انه يشوف الناس الغلابة

يشوفهم بجد لا بالكلام ولا الشعارات

بالمناسبة هو امتى قانون الارهاب يخرج للنور

ولا احنا بنموت فى الطوارئ

الحدق يفهم باة

قانون الحكومة عايزاه خرج فى يومين ( قانون التظاهر فى دور العبادة )
قانون الحكومة مش عايزاه بقاله اكتر من ست سنين فى مجلس الشعب ( قانون الارهاب )

انا تعبت خلاص

__________________

الدعاء بالرحمة لأختنا شئ من ألم